Amazon-ի հիմնադիրը 10 մլրդ դոլար է տրամադրել կլիմայի փոփոխության դեմ պայքարին

Amazon ընկերության հիմնադիր Ջեֆ Բեզոսը խոստացել է 10 միլիարդ դոլար տրամադրել իր սեփական միջոցներից կլիմայի փոփոխության դեմ պայքարի համար։ Ինչպես գրում է «Ամերիկայի ձայնը», աշխարհի ամենահարուստ գործարարը դրա մասին հայտարարել է երկուշաբթի օրը ինստագրամի գրառման միջոցով՝ կլիմայի փոփոխությունը որակելով «մոլորակի ամենամեծ սպառնալիք»:

Նա ընդգծել է, որ իր Bezos Earth հիմնադրամն այս ամառվանից կսկսի տրամադրել դրամաշնորհներ:

Այս հայտարարությամբ Բեզոսը միացավ մի քանի միլիարդատեր այն գործարարներին, ովքեր խոստացել են գումարներ տրամադրել կլիմայի փոփոխության դեմ պայքարին: Նրանց թվում են Microsoft-ի համահիմնադիր Բիլ Գեյթսը, Նյու Յորքի նախկին քաղաքապետ Մայքլ Բլումբերգը և գործարար Թոմ Սթեերը:

Վերջին շրջանում Amazon-ը ենթարկվում էր քննադատության անգամ սեփական աշխատակիցների կողմից՝ այս ոլորտին բավարար ուշադրություն չցուցաբերելու համար: Ընկերությունն իր աշխատանքներն իրականացնելիս օգտագործում է մեծ քանակությամբ ավտոմեքենաներ՝ առաքումներ իրականացնելու համար, որով նպաստում է դեպի մթնոլորտ թունավոր արտանետումների ծավալների մեծացմանը: Անցած տարի Amazon-ի հիմնադիրը խոստացել է միջոցներ ձեռնարկել՝ արտանետումները մինչև 2040 թվականը զգալիորեն կրճատելու համար:

Share: