Վիկտոր Մնացականյանի հրաժարականը կորուստ է Կենտրոն վարչական շրջանի համար

Երևանի ավագանու «Իմ քայլը» խմբակցության անդամ Իզաբելլա Աբգարյանը Sputnik Արմենիայի հետ զրույցում անդրադարձել է Կենտրոն վարչական շրջանի ղեկավար Վիկտոր Մնացականյանի հրաժարականի հարցին։

Երևանի ավագանու անդամների համար անսպասելի է եղել Կենտրոն վարչական շրջանի ղեկավար Վիկտոր Մնացականյանի հրաժարականի մասին լուրը։ Այս մասին Sputnik Արմենիայի հետ զրույցում ասաց Երևանի ավագանու «Իմ քայլը» խմբակցության անդամ Իզաբելլա Աբգարյանը։

«Այդ մասին մենք տեղեկացանք լրատվամիջոցներից։ Երբեք նման խոսակցություն չէր եղել, և մինչև նախորդ շաբաթ աշխատանքային քննարկումների մեջ էինք։ Նույնիսկ խմբակցության նիստում որևէ մեկը տեղյակ չէր»,-ասաց Երևանի ավագանու անդամը։

Իզաբելլա Աբգարյանի խոսքով` անցած մեկ տարվա ընթացքում բավականին մեծ աշխատանք է արվել համատեղ։

«Վիկտոր Մնացականյանը վարչական շրջանների այն ղեկավարներից էր, որոնք անընդհատ կարևորում են ավագանու անդամների կարծիքը, և նախքան որևէ բան նախաձեռնելը նաև մեզ հետ հաշվի էր նստում»,-ասաց Աբգարյանը։

Վիկտոր Մնացականյանի հրաժարականը, Իզաբելլա Աբգարյանի որակմամբ՝ կորուստ է Կենտրոն վարչական շրջանի համար։ Աբգարյանը Sputnik Արմենիայի հետ զրույցում ասաց, որ դեռ պարզ չէ, թե ով կփոխարինի Վիկտոր Մնացականյանին Կենտրոն վարչական շրջանի ղեկավարի պաշտոնում։

Կենտրոն վարչական շրջանի ղեկավար Վիկտոր Մնացականյանը Facebook–ի իր էջում գրելով հրաժարականի մասին, հավելել էր, որ այդ որոշումը կայացրել է, քանի որ ցանկանում է զբաղվել քաղաքային հիմնախնդիրների խորքային ուսումնասիրությամբ։ Մնացականյանը համոզմունք էր հայտնել, որ այդպիսով կկարողանա շատ ավելի օգտակար լինել սիրելի քաղաքին ու երկրին: 

«Այս քայլս ամենևին չի նշանակում, որ հեռանում եմ այն թիմից, որի մասն եմ եղել ու որի հետ աշխատելու պատիվ եմ ունեցել: Պաշտոնը թողնելու որոշումս չունի քաղաքական դրդապատճառ ու բացառապես անձնական որոշում է: Թող ոչ ոք չփորձի շահարկել այն քաղաքական նկատառումներով կամ դրա շուրջ դավադրության տեսություններ հյուսել»,–գրել էր Վիկտոր Մնացականյանը:

Share: